17 декабрь куни Бразилиянинг интернет провайдерлари фойдаланувчиларининг WhatsApp мессенжерига киришини вақтинчалик тақиқлаб қўйди. Бу эса Telegram учун айни муддао бўлди.
Telegram вакиллари 18 декабрда тарқатган баёнотга кўра, WhatsApp тақиқи қарори чиққанидан буён 5.7 млн янги фойдаланувчи рўйхатдан ўтган.

WhatsApp’нинг блокланиши қарор чиққанидан 12 соат ўтиб бекор қилинди.
Эслатиб ўтамиз, 16 декабрь куни Бразилиянинг Сан-Бернарду-ду-Кампу шаҳри суди мессенжерни 48 соатга мамлакат ҳудудида тақиқлаш ҳақида қарор чиқарди. Қарор ўз кучига 17 декабрь тунида кирди.

Маълум бўлишича, полиция ўтказаётган бир тафтиш юзасидан мессенжер фойдаланувчи ҳақида маълумот тақдим этиши лозим бўлган, аммо илова расмийлари бунга рози бўлмаган. Бунга жавобан WhatsApp блокланган.
Тахмин қилинишича, текширув ишлари пойтахтда фаолият юритувчи, ваҳший қотилликлар ва полицияга ҳужумлари билан танилган PCC гуруҳи билан боғлиқдир.