Париж воқеалари ва Сан-Бернардинодаги терактлар натижасида сўнгги бир ойда америкалик мусулмонларга нисбатан содир этилаётган жиноятлар сони уч баробарга ортди, деб ёзмоқда The New York Times газетаси Калифорния Университети мутахассислари ўтказган тадқиқот натижаларига асосланган ҳолда.

Нафратга асосланган бу каби жиноятлар ҳижобдаги талаба-қизларга ҳужум қилиш, масжидларга ўт қўйиш ва вандализм, мусулмонларга тегишли компанияларга таҳдидларни ўз ичига олади. АҚШ президенти Барак Обама ва ҳуқуқ ҳимоячилари мамлакатда, айниқса Калифорния штатида аксилмусулмон кайфиятининг ортиб бораётганидан огоҳлантирган эди. Бироқ таҳлиллар бу каби кайфият америкалик сиёсатчилар ўртасида ҳам тарқалаётганини кўрсатмоқда.

ФРБ маълумотларига кўра, сўнгги йилларда ҳар ойда ўртача 12 маротаба ислом динига эътиқод қилувчиларга қаратилган жиноят содир этилаётган эди. Ўтган бир ой муддат ичида эса мазкур кўрсаткич 36 маротабага ортган. Жумладан, полиция Сан-Бернардинодаги ҳужумлардан сўнг мусулмонларга уюштирилган 18та ҳужумни қайд этди. Криминолог Брайан Левин эса вазият 2001 йилнинг 11 сентябрига қараганда анча юмшоқ эканини, ўша пайтда юзлаб мусулмонларга нисбатан хуружлар уюштирилганини эсга олиб ўтди.

Бундан аввалроқ эса АҚШда Эрик Фейт исмли 57 ёшли эркак мусулмонларни ўлдириш учун кўчма рентген қурилмаси яратишда ёрдам бергани учун 8 йиллик қамоқ жазосига тортилгани ҳақида хабар қилинган эди.