Россия вакиллари Сурия президенти Башар Асаднинг ўтиш жараёни доирасида ўз лавозимидан кетишига тайёрликларини маълум қилдилар. Бу ҳақда ғарб давлатлари дипломатларига иқтибос келтирган ҳолда Reuters ахборот агентлиги маълум қилди.

“Россияликлар ўзаро суҳбатларда Асад ўтиш жараёни охирида кетишини қабул қилишга тайёргарликларини айтмоқдалар. Улар ҳозирча бу ҳақда оммавий равишда айтишга тайёрмаслар”, деб айтди дипломатлардан бири. Унинг бир неча ҳамкасблари бу маълумотни тасдиқлади.

Уларнинг айтишича, Ғарб ва Россиянинг Сурия муаммоси бўйича муносабатларида ҳозирча анча қарама-қаршиликлар мавжуд, бироқ бу қарама-қаршиликлар секин-аста камаймоқда.

Шунингдек, таъкидланишича, Москва Теҳрондан кўра Башар Асаддан узоқлашишга кўпроқ тайёр. Дипломатлардан бирининг айтишича, Эронда ҳали ҳам Асаднинг ҳокимият тепасида қолиши талаб қилинмоқда.

Юқори лавозимдаги дипломатлардан бири Россия ҳукумати Асаднинг ўрнини эгаллай оладиган номзодлар рўйхатини тайёрлаб қўйганини айтди, бироқ бунинг тафсилотларини келтирмади. Эронда бундай рўйхатнинг борлиги ҳақида маълумот ҳозирча мавжуд эмас.