Кеча берган катта матбуот анжуманида Россия президенти Владимир Путин 2008 йилги Грузия билан уруш ҳамда Украинадаги бугунги вазиятга тўхталар экан, Грузиянинг собиқ президенти, Одесса вилояти ҳокими Михеил Саакашвилини “илиқ” сўзлар билан эслади.

Унинг Одессага ҳоким этиб тайинланиши “украин халқининг юзига тупуриш” билан баробар эканлигини айтиш баробарида, у АҚШдан виза ололмаганини ҳам таъкидлаб ўтди. Ўз навбатида, Саакашвили Facebook’даги саҳифасида азалий рақибининг бу сўзларига жавоб берди.

“Украина воқеалари билан параллель равишда бугун Москвада Путин, ҳар доимгидай, мени эсга олди”, - деб ёзди сиёсатчи.

“Владимир Владимирович мени ҳеч эсдан чиқара олмайди, Украинадаги ишим унга ёқмаяпти, тушунаман, - сўзида давом этди у. – Агар биз Украинада коррупциянинг умуртқасини синдирсак ва чуқур ислоҳотлар ўтказсак, унинг ёлғон салтанати қартали уйчадай сочилиб кетади”.

Саакашвили виза ҳақидаги гап-сўзлар ёлғон эканлигини эътироф этди: “Путин яна бир бора ёлғон гапирди, гўё америкаликлар менга виза бермаган эмиш, ваҳоланки менда ўн йиллик туристик ва уч йиллик ишчи визаси бор. Менга нисбатан ёлғонни кўпайтириб юборди, яқинда у бурнини пластик жарроҳликдан ўтказишига тўғри келса керак, ўсиб чиқмаслиги учун”.