АҚШ президентлигига номзод Дональд Трамп Россия етакчисининг америкалик миллиардер “президентлик пойгасида мутлақ етакчи” экани тўғрисидаги сўзларига изоҳ берди, дея хабар қилмоқда Politico. Тадбиркор мазкур баҳо унинг учун катта ифтихор эканини маълум қилди.

“Ҳар доим нафақат ўз мамлакати, балки ундан ташқарида ҳам ҳурмат қилинадиган кишидан хушомад эшитиш улкан ифтихор саналган”, - деди Трамп. У Россия ва АҚШ терроризмга қарши кураш ҳамда бутун дунёда тинчлик ўрнатиш бўйича ҳамкорликда муваффақиятли иш олиб бориши мумкинлигини таъкидлаб ўтди. Трампнинг сўзларига кўра, савдо ва бошқа соҳалардаги ҳамкорлик Вашингтон учун ҳам, Москва учун ҳам бирдек манфаатли.

17 декабрь куни Россия етакчиси Трампнинг Россия ва Америка муносабатларини яхшилашга уринишига ижобий муносабатда эканини маълум қилган эди. “У муносабатларнинг бошқа мустаҳкамроқ даражасига ўтишни истаётгани ҳақида сўзлайди. Буни биз олқишлашимиз керак эмасми? Албатта, буни олқишлаймиз”, - дея Путин сўзларидан иқтибос келтирди ТАСС. Россия президенти ўз сўзида Трампни ёрқин ва иқтидорли инсон деб атади.