АҚШнинг Виржиния штатидаги барча мактаблар 18 декабрда “арабча ёзувдаги” уй вазифаси сабабли ёпилди. CNN телеканалининг маълум қилишича, можаро ҳуснихатни ўрганиш сабабли келиб чиққан.

“Бу шаҳодат, арабчада ёзилган Тангрининг ягоналигига иймон келтиришдир. Уни ёзишга ҳаракат қилиб кўр. Бу сенга ҳуснихатнинг бадиий томондан мураккаблигини тасаввур қилишингга имкон беради”, деб айтилганди ўқувчиларга таклиф қилинган вазифада.

Бу уй вазифаси ижтимоий тармоқларда катта сондаги хабарлар билдирилишини келтириб чиқарди ва жамоатчилик томонидан норозиликларга сабаб бўлди, оқибатда штат ҳукумати барча мактабларни бир кунга ёпиб қўйишга қарор қилди. “Ўқувчиларга хавф бўлмаса ҳам, мактаблар бутун жума куни ёпиқ бўлади”, деб айтилди таълимга жавоб берувчи раҳбарлар баёнотида.

Телеканалнинг маълум қилишича, баъзи жунбушга келган ота-оналар уларнинг фарзандлари исломни қабул қилишга мажбур қилинмоқдалар, деб ўйлашган. Улар бу вазифани берган ўқитувчини бўшатиб юборишни талаб қилдилар, бироқ ўқитувчи бу вазифани ўзи ўйлаб топмагани, балки дунё динлари бўйича дарсликдан олганини айтган.

Шаҳодат сўзма-сўз гувоҳлик деб таржима қилинади ва исломнинг бош фарзи ҳисобланади. Унда шундай дейилади: “Гувоҳлик бераман албатта Аллоҳдан бошқа илоҳ йўқдир, яна гувоҳлик бераман албатта Муҳаммад алайҳиссалом Аллоҳнинг бандаси ва элчисидир”. Қадимда шаҳодатнинг расмий шахс олдида “чин юракдан” уч марта кетма-кет айтилиши исломнинг қабул қилинишини англатган.

Fox телеканали ноябрь охирида содир бўлган шунга ўхшаш ҳолат ҳақида хабар берганди. Ўшанда Юта штатидаги мактаблардан бирида ўқувчиларга ИШИДни тарғиб қилувчи плакат яратиш таклиф қилинганди. Кейинроқ мактаб раҳбарияти ушбу воқеа юзасидан ўз узрини келтирган.