АҚШнинг Gibbs Investment Holdings компанияси Ўзбекистонда кальцинацияланган сода ишлаб чиқарувчи завод лойиҳасини амалга оширишни режалаштирмоқда. Бу ҳақда “Ўзкимёсаноат”даги манбасига таянган ҳолда Sputnik агентлиги хабар бермоқда.

Унинг сўзларига қараганда, икки томон лойиҳани амалга ошириш имкониятларини ўрганиш бўйича қўшма меморандум имзолаган. АҚШ компанияси 2016 йил биринчи чорагининг охиригача батафсил таклиф тайёрлаши, шундан сўнг қурилишнинг кейинги истиқболлари белгиланиши кутилмоқда.

“Агар биз келишиб олсак, қурилиш бир йилдан кўп вақт олмайди. Чет эл инвестицияларининг умумий ҳажми 7 млн долларни ташкил қилади”, - дейилади хабарномада.
Бугун Ўзбекистонда Марказий Осиёда кальцинацияланган сода ишлаб чиқарувчи ягона корхона бўлмиш Қўнғирот сода заводи ишлаб турибди. Унинг йиллик қуввати 100 минг тоннани ташкил этади.

У 2006 йили Хитойнинг CITIC Интернешнл компанияси томонидан ишга туширилган. Қурилишга 109.5 млн доллар инвестиция қилинган. Маҳсулот асосан Туркия, Россия, Қозоғистон, Туркманистон ва бошқа давлатларга импорт қилинади.