АҚШ президенти Эрдўғанни Ироқдан қўшинларни олиб чиқиб кетишга чақирди

Жаҳон 19 Декабрь 2015 8417

АҚШ президенти Барак Обама телефон орқали суҳбатда Туркия президенти Ражаб Тойиб Эрдўғанни Ироқдан ўз қўшинларини олиб чиқиб кетишга чақирди. Бу ҳақда Оқ уй матбуот хизмати маълум қилди. 

“Барак Обама Эрдўғанни Ироқ билан кескинликнинг авж олишига барҳам бериш бўйича қўшимча чоралар кўришга, жумладан турк қуролли кучларининг олиб чиқиб кетилишига чақирди ҳамда Туркия томонидан Ироқнинг ҳудудий бутунлиги ва дахлсизлиги ҳурмат қилиниши лозимлигини тасдиқлади”, дейилмоқда хабарда.

Икки давлат етакчиси АҚШ, Туркия ва Ироқнинг дипломатик саъй-ҳаракатларини кескинликни камайтириш ва ИШИДга қарши ҳарбий ҳаракатларни мувофиқлаштириш учун бирлаштиришга келишиб олдилар. Обама Туркиянинг ИШИДга қарши кураш ва ўртамиёна Сурия мухолифатини мустаҳкамлаш муҳимлигини таъкидлаб ўтди.

4 декабрда турк аскарлари батальони Ироқнинг шимолида, ИШИД томонидан босиб олинган Мосул яқинида жойлаштирилгани маълум бўлганди. Эрдўғаннинг айтишича, турк ҳарбийлари Бошиқ лагерида Ироқ бош вазири Ҳайдар ал-Ободийнинг 2014 йилдаги илтимоси билан жойлаштирилган. Турк ҳарбийлари миссиясидан расмий мақсад террорчиларга қарши кураш учун маҳаллий кўнгилли аскарларни тайёрлашдан иборат.

Кўпроқ янгиликлар