Украинанинг ForexClub ахборот-таҳлилий маркази мутахассислари йил бошидан буён Қозоғистон тенгеси 85.2 фоизга девальвацияга учраганини аниқлашди. Бу кўрсаткич бўйича у жорий йилда биринчи деб тан олиниб, Европа ва МДҲнинг энг заиф валютасига айланди.

“АҚШ долларининг Европа ва МДҲ давлатлардаги динамикаси 16 декабрь ҳолатига кўра: Қозоғистон – 85.2 фоиз, Беларусь – 54.3 фоиз, Украина — 48.7 фоиз, Қирғизистон – 33.9 фоиз, Озарбайжон– 33.8 фоиз, Тожикистон – 28.9 фоиз, Грузия – 28.7 фоиз, Туркия — 28.4 фоиз, Молдова — 26.6 фоиз, Россия – 25.9 фоиз”, — дейилади тадқиқот матнида.

Туркманистон манатида 19.3, Ўзбекистон сўмида 14.8, Арманистон драми 1.4 фоизлик девальвацияга учради. Евро девальвацияси 10.7 фоизни ташкил қилди. Фақатгина Швейцария франки долларга нисбатан 0.3 фоизга мустаҳкамланди.

Охирги 2 йил якунларига кўра тенге МДҲ ва Европа валюталари ўртасида девальвация даражасининг юқорилиги бўйича иккинчи ўринни олди.
Эслатиб ўтамиз, 2015 йилнинг 20 август куни Қозоғистон Миллий банки миллий валютани сузувчи курсга ўтказиш тўғрисида қарор қабул қилди.