Маълумки, бугун Ироқ ташқи ишлар вазири Иброҳим ал-Жаъфарий БМТ Хавфсизлик Кенгашига мурожаат қилиб, мамлакат шимолига Туркия қўшинларининг кириб келиши юзасидан резолюция қабул қилишга чақирди.

Унинг сўзларига қараганда, резолюция “турк оккупацияси”ни қоралаши ҳамда “давлат иродасига қарши ноқонуний бостириб кириш”ни акс эттириши лозим.
Шу муносабат билан Туркиянинг БМТдаги доимий вакили Ҳолит Чевик Хавфсизлик Кенгашининг Ироқ мурожаати юзасидан чақирилган навбатдан ташқари йиғилиши чоғида расмий Бағдодни ИШИДга ён босишда, террорчиларга қарши кураш ишини тўхтатиб қолишда айблади.

Чевик Туркия ҳеч қачон Ироқ суверенитетини бузишдан манфаатдор бўлмаслигини ишонтириб айтди.
“Анқара вазиятни юмшатиш учун етарлича чоралар кўрди. Аввал бошидан биз масалани икки томонлама каналлар орқали ҳал қилишга уриндик. Бу масалани халқаро майдонларга олиб чиқиш жаҳон ҳамжамиятининг ИШИДга қарши бирдамлигини бузишдан бошқа бирор мақсадга хизмат қилмайди”, - таъкидлади Чевик.