Хитойлик миллиардер, Fosun Group компанияси раҳбари Го Гуанчан аксилкоррупцион тергов юзасидан олиб борилаётган иш бўйича қўлга олингани ҳақидаги миш-мишлар ортида сирли йўқолганидан кейин бир ҳафта ўтиб Нью-Йоркда кўриниш берди, деб хабар бермоқда The Wall Street Journal нашри.

Таъкидланишича, Го Гуанчаннинг Манхэттендаги ресторанлардан бирида кечки овқат тановул қилаётгани тасвирланган фотосуратлар ижтимоий тармоқларда тадбиркор ҳукумат томонидан бир махсус терговда иштирок этгани ҳақидаги изоҳлар билан пайдо бўла бошлади.     

Можаро ўтган ҳафтада, Fosun топ-менежерлари Гуанчан билан алоқани йўқотиб қўйганларидан кейин юз берди. Оқибатда топ-менежерлар компаниянинг акцияларини Гонконг биржасида сотишни тўхтатиб қўйишди.

Компания вакили Fosun раҳбари кейинги ҳафтада Монреалга боришини тасдиқлади. Жаҳон ОАВлари Го Гуанчанни Хитойнинг Уоррен Баффети деб атайдилар. 2015 йилда у Forbes талқини бўйича хитойлик миллиардерлар орасида 34-ўринни эгаллаган. Гуанчаннинг бойлиги 2,12 млрд долларга баҳоланмоқда.

Аввалроқ Fosun International АҚШнинг тижорий кўчмас-мулк брокери Cushman & Wakefield Inc. компаниясини сотиб олиш эҳтимолини қўриб чиқаётгани маълум қилинганди.