Туркия президенти Ражаб Тойиб Эрдўған Фаластин ислом ҳаракати ХАМАС сиёсий бюросининг раиси Холид Машъал билан учрашди, деб хабар бермоқда Исроил ҳукуматидаги манбага иқтибос келтирган ҳолда Reuters ахборот агентлиги.

Таъкидланишича, Машъал “Эрдўғанга минтақада юз берган охирги воқеалар ҳақида қисқача маълумот берган”, бироқ тафсилотларга берилмаган.

Агентликнинг таъкидлашича, учрашув Туркия ва Исроил ўртасида муносабатларнинг тикланиши ҳақидаги дастлабки келишув тузилиши ортида бўлиб ўтди.

Исроил ва Туркия ўртасидаги муносабатлардаги инқироз 2010 йил май ойида бошланган. Ўшанда исроилликлар Ғазо сектори қамалини кесиб ўтмоқчи бўлган озодлик флотилияси кемаларидан бирини ушлаши пайтида 9 нафар фаластинпараст фаол ҳалок бўлган.