Мисрлик йигит ижтимоий тармоқларда ҳукуматга қарши хабарлар тарқатгани учун 3 йилга озодлиқдан маҳрум этилди, деб ёзмоқда Daily Mail нашри.

Тергов маълумотларига кўра, 22 ёшли йигит ҳарбий хизматдан кетишидан бироз олдин фейсбукда суд томонидан ҳақоратли деб топилган бир неча хабар қолдирган.

Бундай хабарларнинг орасида Миср президенти Абдулфаттоҳ Саид Ас-Сисийнинг мультқаҳрамон Микки Маус қулоқлари билан тасвирланган сурати бўлган. Ҳарбий-дала суди аскарнинг ғоялари ҳукмрон тузумнинг ғояларига қарши бўлган, деб ҳукм чиқарган.

Терговчилар суд материалларида йигитнинг ижтимоий тармоқдаги паролини ўзгартириб, унинг хабарларини ўқишганини таъкидлашган. Бу хабарларда йигит армиядаги оғир шароитлардан шикоят қилган.

“Сатира – давлат демократик бўладими ёки бўлмайдими, ўз фикрини билдириш учун онгини ишлатувчи барча одамлар учун йўлдир”, деб изоҳ берди ҳукмга йигитнинг акаси.

Жорий йилнинг баҳорида Миср президенти террорчилик гуруҳлари сабабли интернетни тартибга солиш кераклигини айтган. Ҳуқуқни ҳимоя қилиш ташкилотлари вакиллари бу борадаги янги қонунлар жуда кенг талқин қилиниши ва бу ҳукумат томонидан суиистеъмол қилишларга олиб келиши мумкинлигидан огоҳлантирган.