Ўзбекистон Ташқи ишлар вазири Абдулазиз Комилов бошчилигидаги делегация 21 декабрь куни Остона шаҳрида бўлиб ўтган “Марказий Осиё – Европа Иттифоқи” минтақалараро учрашувида иштирок этди.

Мазкур форумнинг кун тартибига кўра Қозоғистон, Қирғизистон, Тожикистон, Туркманистон ва Ўзбекистоннинг Европа Иттифоқи билан турли соҳалардаги ҳамкорлик истиқболлари муҳокама қилинди ҳамда ЕИнинг Марказий Осиё учун Стратегиясини амалга ошириш жараёни ва унинг самарадорлигини ошириш бўйича томонларнинг таклифлари кўриб чиқилди.

Шу куни Абдулазиз Комилов бошчилигидаги делегация ЕИнинг Ташқи ишлар ва хавфсизлик сиёсати бўйича олий вакили, Еврокомиссия вице-президенти Федерика Могерини билан икки томонлама музокаралар ўтказди.

Музокаралар чоғида “Ўзбекистон – Европа Иттифоқи” шаклидаги муносабатларнинг ҳолати ва истиқболлари, олий ва юқори даражаларда эришилган келишувларни амалга ошириш жараёни ҳамда турли соҳалардаги минтақалараро ҳамкорлик масалалари муҳокама қилинди.

Таъкидланганидек, якунланаётган йилда 1996 йилда имзоланган Ўзбекистон ва ЕИ ўртасида шерикчилик ва ҳамкорлик тўғрисидаги битимга биноан ташкил қилинган деярли барча қўшма институтларнинг мажлислари бўлиб ўтди. Учрашувда халқаро ва минтақавий сиёсатнинг айрим мавзулари юзасидан ҳам фикр алмашилди.