Ўзбекистон Республикаси президенти Ислом Каримов 10 декабрдаги фармони билан 2016 йилги “Соғлом она ва бола йили” Давлат дастури реализациясида инобатга олиниши лозим бўлган устувор вазифаларни белгилаб берди.

Асосий вазифалардан бири сифатида оилани, оналик ва болаликни ҳимоя қилувчи қонунчилик ва меъёрий-ҳуқуқий базани такомиллаштириш кўрсатилди. Қонунчиликда аёлларнинг ҳуқуқлари ҳимоя қилинишини, уларнинг соғлом авлод тарбиялашдаги ролини, оила институтини мустаҳкамлашни кўрсатиб бериш талаб қилинади.

Шунингдек, оналик ва болаликни ҳимоя қилиш, уларнинг соғлиғини таъминлаш учун зарурий ижтимоий, маиший ва тиббий шарт-шароитларни яратиш муҳим устувор вазифалардан бири ҳисобланади. Бу эса, ўз навбатида, тиббиёт муассасаларининг моддий-техник базаси ва кадр салоҳиятини ўстиришни, аҳолининг тиббий маданиятини оширишни, ёшлар орасида жисмоний тарбия ва спортни оммалаштиришни тақозо қилади.
Шунингдек, дастурда оилаларда соғлом маънавий муҳитни яратиш, мактабгача таълим муассасалари тармоғини ривожлантириш сингари вазифалар кўзда тутилган. Энг муҳими – қизлар ва аёлларнинг ҳуқуқлари инобатга олинган, яъни бўлажак оналарнинг ақлан ва жисмонан соғлом бўлиб ўсишларини таъминлаш, коллежни битираётган қизларни иш билан таъминлаш сингари масалалар кўтарилган.

“Соғлом она ва бола йили” Давлат дастурини ишлаб чиқиш ва реализация қилиш бўйича республика комиссиясига мамлакат бош вазири Шавкат Мирзиёев бошчилик қилмоқда.