Тошкентда маст ҳолда машинага ўғриликка тушган шахс улов эгалари томонидан қўлга олинди. Бу ҳақда “Огоҳ” нашри ёзмоқда.

Айтилишича, Миразиз Миролимов исмли шахс 2015 йилнинг 11 сентябрь куни Чилонзор туманидаги Бунёдкор кўчасига Captiva машинасида келиб, укаси Равшанни кутиб турган. Укаси ҳадеганда келавермагач, дўкон ичига айлангани кириб кетган.

Бир муддатдан сўнг укаси қўнғироқ қилиб, машина эшигини пультда очиб юборишини, ҳужжатларини ичкарига ташлаб қўйишини айтган. Машина очилган, ҳужжатларни солган укаси дўконга кириб, акаси билан саломлашган. Лекин шунда Миразиз пульда эшикни қулфлашга ҳарчанд уринмасин, эшик қулфланмаган.

Хавотир бўлиб, ака-укалар кўчага чиқишган ва нотаниш кимса машина эшигини очиб, салон ичини титкилаётганини кўришган. Уларнинг ҳайқиришини эшитган ўғри қоча бошлаган, лекин сирпаниб йиқилиб тушган. Миролимовлар уни қўлга олишган ва милицияга топширишган.

Аниқланишича, бу 1982 йилда туғилган Рустам Исматов экан. Муқаддам судланган бу шахс маст ҳолда кўчада айланиб юриб, машина эшиги очиқ қолганини кўрган ва унинг ичидаги моддий қимматликларни ўғирламоқчи бўлган. Лекин вақтида кўчага чиққан машина эгалари уни ушлашга муваффақ бўлган.