“Ўзметкомбинат” АЖ раҳбарияти Италиянинг Danieli компанияси вакиллари билан учрашувлар ўтказиб, “Иссиқликда деформация қилинган чоксиз пўлат қувурлар ишлаб чиқаришни ташкил этиш” ва “Пўлат арқонларни ишлаб чиқаришни ташкил этиш” лойиҳаларини муҳокама қилди.

АЖ инвестициялар департаменти бошлиғи Наримон Умаровнинг маълум қилишича, учрашув доирасида компаниялар мутахассислари иштирокида техник муҳокама ўтказилиб, унда юқоридаги инвестицион лойиҳаларнинг жорий концепцияси кўриб чиқилган ҳамда техник масалалар муҳокама қилинган.

“Учрашув якунларига кўра техник йиғиннинг юқоридаги лойиҳалар реализацияси бўйича ҳамкорлик борасидаги баённомаси имзоланди”, - маълум қилди амалдор.
Италиянинг Danieli компанияси металлни қайта ишлаш саноати учун қурилмалар етказиб бериш бўйича дунёда учинчи ўринни эгаллайди. Компания Италия, Германия, Австрия, Швеция, Таиланд, Хитой, Ҳиндистон ва Россияда саккизта заводга эга.