Миср ҳукумати Синай яриморолида Россия самолёти ҳалокатга учрагандан кейин бир қатор аэропортлар хавфсизлигини баҳолаш учун Control Risks халқаро консалтинг фирмасини ёллади, деб хабар бермоқда Миср сайёҳлик вазири Хишам Заъзу.

Миср аввалроқ декабрда ҳалокат ҳақида дастлабки баёнот устида ишлаган экспертлар фалокатга учраган A321 самолёти бортида қандайдир ноқонуний ҳаракатлар ёки терактни исботловчи бирор далил топа олмаганларини маълум қилганди.

Россия ҳукумати 224 кишининг умрига зомин бўлган ҳалокатга самолёт бортида қўлбола портловчи қурилманинг портлагани сабаб бўлганини айтганди.

Самолётнинг ҳалокатга учраши учун жавобгарликни ИШИД ўз зиммасига олган ва портловчи модда газли ичимлик банкаси ичида бўлганини айтган.

Россия самолётининг қулаши Мисрнинг сайёҳлик тармоғига қаттиқ зарба берган.