Америкалик актёр Николас Кейж АҚШ ҳукуматига аукцион савдоларида 276 минг долларга сотиб олган динозавр бош суягини қайтариб беришга розилик билдирди. Аслида ўғриланган бўлган мазкур ноёб ёдгорлик у топилган Мўғулистонга қайтариб берилади, дея хабар тарқатмоқда Reuters.

Ўтган ҳафтада Манҳэттен прокуратураси тарбозавр бош суягини Мўғулистонга қайтариш бўйича даъво аризасини кўриб чиққан. Ҳужжатларда Кейж мазкур топилманинг эгаси экани кўрсатиб ўтилмаган. Бироқ актёрнинг вакили уни 2007 йилнинг мартида Беверли-Хиллздаги (Калифорния штати) I. M. Chait галереяси вақтида сотиб олинганини тасдиқлади. Шу билан бирга унинг ҳақиқийлигини тасдиқловчи сертификатни ҳам қўлга киритган.

2014 йилнинг июлида АҚШ миллий хавфсизлик вазирлиги актёрни у сотиб олган бош суяги ўғриланган бўлиши мумкинлиги ҳақида огоҳлантирган. Кейинчалик мазкур ноёб топилма ноқонуний равишда АҚШга олиб келингани аниқланди ва Кейж уни қайтариб беришга розилик билдирди.

Актёрга қандайдир ҳуқуқни бузганлиги тўғрисида айбловлар қўйилмаган.

Reuters бошқа манбаларга таяниб аниқлик киритишича, Кейж ушбу топилмани қўлга киритишда бошқа бир актёр Леонардо Ди Каприо билан курашишига тўғри келган. Агентлик шунингдек I. M. Chait галереяси бир сафар ноқонуний йўл билан олиб кирилган динозавр устихонини сотганини, галерея сотиладиган буюмлар учун кафиллик бермаслигини эслатиб ўтган.