Аргентинанинг "Ривер Плейт" жамоаси расмий сайтида "Барселона" жамоаси ҳужумчиси Лионель Мессидан клублар ўртасидаги жаҳон чемпионатидан қайтишда Токио аэропортида аргентиналик мухлислар томонидан футболчига нисбатан амалга оширилган хатти-ҳаракатлар учун узр сўралган мактуб жойлаштирилди.

Япония пойтахти Токио шаҳрида турнир финалида "Барселона" ва "Ривер Плейт" жамоалари учрашган, бу учрашувдаги голлардан бирини Месси урган, аргентиналик мухлислар бундан норози бўлишиб, аэропорт ҳудудида Мессига тупуришганди.

Шунингдек, улар "Барселона"нинг бошқа футболчиларини ҳақоратлашган.

Шу куннинг ўзида "Ривер Плейт" жамоаси президенти Родольфо Д'Онофрио бу ҳодиса учун узр сўраганди.

Қайд этиш керакки, "Барселона" Токиодаги финални ютиш орқали учинчи марта клублар ўртасидаги жаҳон чемпионатида ғолиб бўлди. Каталонияликлар бундан олдин 2009 ва 2011 йилларда ҳам бу турнирда зафар қучишганди.