Сурия Ташқи ишлар вазири Волид Муаллим жорий ҳафта давомида Хитойга расмий ташриф билан келади. Бу ҳақда Хитой ТИВ вакили Хун Лэйга асосланган ҳолда РИА Новости хабар тарқатган.

"Хитой Ташқи ишлар вазири Ван Ининг таклифига биноан Сурия ТИВ раҳбари Волид Муаллим 23 декабрдан 26 декабргача Хитойда бўлади", дейилган хабарда.

Унинг сўзларига кўра, икки давлат вазирлари учрашувида Хитойнинг Суриядаги вазиятга муносабати билдирилади ва бу вазиятни ҳал қилиш йўллари муҳокама қилинади.

Бундан олдинроқ, Хитой Сурия мухолифатини мамлакатдаги сиёсий инқирозни ҳал қилиш бўйича ўтказиладиган музокарадаги асосий иштирокчи томон сифатида тан олганди.

Қайд этиш керакки, БМТ Хавфсизлик кенгашининг вето қўйиш ҳуқуқига эга 5 аъзосидан бири бўлмиш Хитой вакили Суриядаги вазиятнинг иккинчи муҳокамаси ўтказилган Вена учрашувида қатнашганди.