Венесуэла расмийлари Каукагуа шаҳридаги Pepsi заводи ходимларини қўлга олиб, сўроқ қилишди ва яна қўйиб юборишди. Венесуэла президенти Николас Мадуро завод раҳбарини товарлар камомадини сунъий равишда ушлаб туришда айблагани туфайли бу иш амалга оширилди.

Венесуэладаги энг йирик ичимлик ва озиқ-овқат маҳсулотлари ишлаб чиқарувчи компанияларидан бири Empresas Polar’нинг Twitter ижтимоий тармоғидаги микроблоги орқали бу воқеалар тафсилотлари хабар қилинди.

Айтилишича, меҳнат вазирлиги ва полиция ходимлари Polar’га тегишли Pepsi заводига 18 декабрда келиб, ходимларни қўлга ола бошлаган. Илгарироқ завод хом ашё етишмовчилиги туфайли ишни тўхтатган эди. Мадуро эса компанияни бундай ишни атайлаб амалга оширишда айблаган эди.

Компания қўйилган айбловларни рад қилмоқда. Ўз навбатида, Мадуро буни мухолифат раҳбарлари ва хусусий компаниялар бошлиқлари эълон қилган иқтисодий урушнинг таркибий қисми деб ҳисобламоқда.