АҚШ Давлат департаменти 2016 йилда АҚШ Конгресси сенати Марказий Осиёда ядро қуролидан холи ҳудуд ҳақидаги битимнинг баённомасини тасдиқлашга умид қилмоқда. Бу ҳақда журналистларга АҚШ Давлат котибининг Жанубий ва Марказий Осиё бўйича ўринбосари Дэниэл Розенблюм маълум қилди.

“Биз бу битим билан жуда яхши танишмиз ва маъмуриятимиз бу келишувнинг ратификация қилинишини тавсия қилади. Биз сенатга буни тавсия қилдик, билганингиздек, бизда халқаро шартномаларни ратификация қилиш ва тасдиқлашнинг мураккаб тизими мавжуд”, деб айтди Розенблюм матбуот-анжуманда.

“Бир неча ой аввал маъмуриятимиз бу битимни сенатга тақдим қилган ва 2016 йилда у тасдиқланишига умид қиламиз... Биз бунга қарши сенатда ҳеч қандай мухолифатни кўрмаяпмиз”, деб қўшимча қилди Розенблюм.

Марказий Осиёда ядро қуролидан холи ҳудуд ҳақидаги битим 2006 йил 8 сентябрда Ўзбекистон, Қозоғистон, Қирғизистон, Тожикистон ва Туркманистон томонидан Семипалатинскда имзоланган. Битим ядровий қуролга эга давлатлар томонидан имзоланиши учун очиқ бўлган баённомага эга. Ушбу баённомага кўра, уни имзолаган давлатлар битим иштирокчиларига қарши ядровий қурол ишлатмаслик ва уни ишлатиш билан таҳдид қилмаслик мажбуриятини ўз зиммаларига оладилар.