АҚШ хизматчилари Буюк Британияда яшовчи мусулмонлар оиласини Гатвик аэропортида самолёт бортига қўйишмади. Буюк Британия бош вазири Дэвид Кэмерон АҚШ ҳукуматидан ушбу ҳолат сабабларини тушунтирилишини талаб қилишини айтди. Бу ҳақда Associated Press ахборот агентлигига бош вазир вакиллари маълум қилди.

Агентлик маълумотларига кўра, 15 декабрда 11 кишидан иборат мусулмонлар оиласи АҚШга учаётган самолёт бортига чиқарилмаган. Оила Диснейлендда ҳордиқ чиқармоқчи бўлган.

Лейбористлар партияси аъзоси Стелла Криси АҚШ ҳукумати рад этиш сабаби тушунтирилмаганини маълум қилди. Таъкидланишича, АҚШнинг Лондондаги элчихонаси ҳам изоҳ беришдан бош тортган.

Ушбу воқеа Дональд Трампнинг АҚШга мусулмонларни қўймасликни таклиф қилган гапи ортида хавотир уйғотмоқда.

Лондонлик имом Акмал Масрур АҚШга сафар уюштирмоқчи бўлганда унга ҳам нисбатан шундай қилинганини айтди. Унинг айтишича, элчихона вакиллари унинг самолётга чиқишига йўл беришмаган ва унинг аввал амал қилган визаси бекор қилинганини айтишган.