Хабарингиз бор, 2015 йилнинг 9 декабрида Ўзбекистон Республикаси Вазирлар Маҳкамасининг “Концерт-томоша фаолиятини амалга ошириш тартибини янада такомиллаштириш чора-тадбирлари тўғрисида”ги 354-сон қарори қабул қилинган эди. Айни пайтда “Ўзбекнаво” эстрада бирлашмаси томонидан мазкур қарор ижросини таъминлашга қаратилган чора-тадбирлар режаси ишлаб чиқилмоқда.

Ўзбекистон Миллий матбуот марказида ўтказилган “Ўзбекнаво” эстрада бирлашмаси: кеча ва бугун” мавзусидаги матбуот анжуманида ушбу чоралардан бири сифатида Ўзбекистонда фаолият кўрсатаётган радио ва телевидениеда миллий мусиқа тарғиботи учун ажратилган эфир вақтининг узайтирилиши маълум қилинди.

“Ўзбекнаво” эстрада бирлашмасининг бош директор ўринбосари Муроджон Мажидовнинг таъкидлашича, аксарият ҳолларда ушбу мусиқий асарлар тижорий мақсадларда яратилмагани боис санъаткорлар тижорий дастурларга ўз ижро намуналарини тақдим эта олишмайди. Шу сабабли мазкур тартиб кучга кирмоқда.