Англиянинг «Манчестер Юнайтед» клуби етакчи футболчилари АПЛнинг 17-туридан ўрин олган «Норвич»га қарши учрашувдаги мағлубиятдан (1:2) кейин жамоа бош мураббийи Луи ван Гаал билан бирга инқироз вазиятидан чиқиш режасини муҳокама қилишган.

The Daily Mail нашрининг берган хабарига кўра, голландиялик мутахассис билан учрашувда Уэйн Руни, Майкл Кэррик, Крис Смоллинг ва Хуан Мата иштирок этишган. Улар мураббийнинг машғулотлар процесси, ортиқча қаттиқ режим ва учрашув пайтида тактикадан норози бўлишган.

Футболчиларнинг фикрига кўра, жамоадаги жароҳатларнинг кўпайишига машғулотлар жараёнидаги ортиқча юкламаларнинг кўплиги сабаб бўлмоқда. Шу мақсадда улар ван Гаалдан машғулотлар пайтида юкламаларни қисқартиришни сўрашган.

Бундан ташқари, қайд қилинишича, ван Гаалдан асосан испаниялик Мата ва Андер Эррералар норози бўлишмоқда. Улар Евро-2016 мусобақасида терма жамоа сафидан жой ола билмай қолишдан чўчишмоқда.

Газетага кўра, ван Гаал футболчиларнинг талабини тўғри қабул қилган ва томонлар мавсумни муваффақиятсиз якунламаслик учун келишиб ишлаш бўйича оғзаки битимга келишган.

Эслатиб ўтамиз, «МЮ» бу мавсумда Чемпионлар Лигасининг плей-офф босқичига чиқишни уддалай олмади, шунингдек 17-турдан кейин АПЛда 5-ўринни эгаллаб турибди.

Олдинроқ, ван Гаал бўлажак иккита ўйиндан бирида мағлубиятга учраган тақдирда истеъфога чиқарилиши ҳақида хабарлар тарқалганди.