Мамлакатимизнинг бош майдони – “Мустақиллик” майдони, Чилонзор тумани Алгоритм даҳасидаги “Roison elektroniks” корхонаси олди ҳудуди ва “Хадра” майдонида 28 декабрдан эътиборан катта байрам тантаналари бўлиб ўтади.

Тошкент шаҳар ҳокимлиги Ахборот хизмати хабарига кўра, ҳозирда ҳар уч манзилда арчаларни ўрнатиш, савдо шохобчалари, турли аттракционларни жойлаштириш ишлари авжида.

Мутахассисларнинг маълумот беришларича, “Мустақиллик ва эзгулик” аркаси олдида шу ҳафта якунига ясатиб бўлиши режалаштирилаётган арчанинг бўйи 26, диаметри 9 метрни ташкил қилади. Арча 1800 дона ўйинчоқ ҳамда “Тошшаҳарнур” ДУК томонидан чироқлар маржони (гирлянда) билан безатилади. Шунингдек, майдонда 24 та безатилган савдо ва 15 та енгил савдо шохобчалари хизмат кўрсатади.

Байрам кунлари майдонларда юртимизнинг таниқли санъат усталари, ёш ижрочилар ва албатта, театрларнинг актёрлари иштирокида байрамона, театрлаштирилган дастурлар ташриф буюрувчиларга хушнудлик улашади.