Сиднейда ўтказилган аксилтеррорчилик рейди давомида Австралия полицияси 20 ва 24 ёшдаги икки йигитни ҳибсга олди, деб хабар бермоқда 9News.

Дастлабки маълумотларга кўра, улардан бири теракт тайёрлаш мақсадида тил бириктиришда, иккинчиси эса унга кўмак беришда айбланиши мумкин. Бу жиноят учун 15 йиллик қамоқ жазоси белгиланган.

Терговнинг фикрича, йигитлар теракт амалга ошрмоқчи бўлган, бироқ уларнинг режалари барбод бўлган. Полициянинг айтишича, “Вуллумулу” ҳарбий-денгиз базаси уларнинг нишонларидан бири бўлган.

Рейд давомида яна 5 киши, жумладан йигитлардан бирининг укаси ҳам қўлга олинди.

Аввалроқ ҳам Австралиянинг яна бир шаҳри Мельбурнда 17 ёшли ўсмир терактга тайёргарлик кўришда гумон қилиниб ҳибсга олинганди.