Тошкентда самарқандлик талабани алдаб пулини олиб қўймоқчи бўлган киракашлар қўлга олинди, деб хабар беради “Огоҳ” нашри.

Айтилишича, Исматулла исмли шахс таниши Мустафони Spark русумли автомобилига ўткизиб, кира ишлаб юрган. Бир куни уларнинг йўлидан ёшроқ йигит чиқиб қолиб, манзилгача элтиб қўйишни сўраган, юкхонага сумкасини солган. Йигитнинг асли самарқандлик эканлиги, касб-ҳунар коллежида ўқишини билган танишлар унинг пулларига эга чиқишга қарор қилишган.

Бир муддат ўтиб, Мустафо манзилига етиб келганини айтиб, тушиб қолган, юкхонадан юкимни олай, қабилида гапириб, аслида талабанинг сумкасини олган. Сумканинг ичида 1.1 млн сўм борлиги аниқланган. Мустафо пулларин олиб, сумкани жойига қўйган.

Бир муддатдан сўнг талаба ҳам манзилига етиб келиб, тушган, аммо сумкасида пуллари йўқлигини аниқлаган. Исматулла Мустафони танимаслигини айтишига қарамай, ундан шубҳаланган талаба тегишли идораларга арз қилган. Натижада киракашларнинг алдови фош бўлиб, улар жавобгарликка тортилган.