“Ўзбекэнерго” АЖ Тошкентнинг Юнусобод туманида қуввати 27 Мвт дан бўлган 4 та газ турбинали қурилмага эга иссиқлик электр станцияси қуриш лойиҳасини техник-иқтисодий асослаш лойиҳасини тайёрлади, деб хабар бермоқда Sputnik Узбекистан нашрига ташкилотдаги манба.

Суҳбатдошнинг айтишича, қурилмалар 4-иссиқлик маркази ҳудудига ёндош ташландиқ ҳудудда қурилмоқчи. Лойиҳа пойтахт аҳолисини иссиқлик ва электр энергияси билан барқарор таъминлаш, табиий ёнилғи-энергетик захираларни тежаш ва янги ишчи ўринларини яратишга қаратилган. 

“Янги қурилиш учун ер ажратдик, ҳозир бу ерга газ олиб келишни ҳал қилмоқдамиз. Кейин тендер ўтказиш учун ташкилий ишларни бошлаймиз. Янги газ турбинали қурилмаларни фойдаланишга киритиш бир қатор технологик инновациялар ҳисобига турар жой биноларига шовқин ва титраш билан таъсир қилишни камайтиришга имкон беради. Бундан ташқари, тумандаги экологик вазият анча яхшиланади”, деб айтди мутахассис.   

Бу лойиҳа Япония халқаро ҳамкорлик агентлиги (JICA) кредити ҳисобига амалга оширилади. Агентликнинг мажбурий шартларига кўра, қурилишни амалга ошириш учун ён-атрофдаги аҳолининг рухсатини олиш керак бўлади, шу сабаби “Ўзбекэнерго” йил бошида аҳоли билан бир қатор учрашув ва семинарлар ўтказди ва ушбу лойиҳанинг афзалликлари билан уни таништирди.

Лойиҳанинг яна бир афзаллиги шундаки, қурилаж ИЭС ўрнида аввал рухсат берилмаган чиқиндихона жойлашганди, бу чиқиндихона ИЭС қурилиши режаси туфайли бартараф этилди.