Техас штатида жойлашган Enterprise Products Partners L.P. компанияси АҚШда 40 йил амал қилган нефть экспорт қилишга тақиқловнинг бекор қилинишидан кейин нефть экспорт қилиш бўйича шартнома тузган биринчи АҚШ компанияси бўлди.

Enterprise Products Техасда қазиб олинган 600 минг баррель нефтни январнинг 1-ҳафтасида Хьюстондаги терминалдан жўнатади.

ОАВ маълумотларига кўра, компания Нидерландиянинг Vitol Group компанияси билан шартнома тузган. Нефтнинг биринчи партиясини Швейцариядаги нефтни қайта ишлаш заводига юбориш режалаштирилмоқда, у ердан ёнилғи Шимолий Европага етказилиши мумкин.

Компания хабарида таъкидланишича, нефтни экспорт қилишга тақиқловнинг бекор қилиниши АҚШда иқтисодий ўсиш ва янги иш ўринларини яратиш ҳамда мамлакатнинг энергетик хавфсизлигини оширишга туртки беради.

18 декабрда президент Барак Обама АҚШнинг 2016 молиявий йил учун бюджет лойиҳасини имзолади, унга кўра 40 йил аввал мамлакатда киритилган америка нефтини экспорт қилишга тақиқлов бекор қилинди.