Испаниянинг энг йирик инжиниринг компанияси Intecsa Ingenieria ҳамда «Ўзкимёсаноат» ўртасида Ўзбекистонда мураккаб ўғитлар ва олтингугурт кислотасини ишлаб чиқариш бўйича завод қуриш тўғрисида битим тузилди.

Лойиҳа қиймати 500 млн долларга тенг корхонанинг қурилиши Intecsa Ingenieria, «Ўзкимёсаноат» ва хорижий банкларнинг кредитлари ҳисобига амалга оширилади.

Завод йилига 288 млн тоннагача моноаммоний фосфат ва йилига қарийб 650 млн тонна олтингугурт кислотасини ишлаб чиқариш қувватига эга бўлади. Қурилиш ишлари 2019 йилда якунланиши режалаштирилмоқда, деб хабар беради telegraf.uz.

1965 йилда асос солинган Intecsa Ingenieria компанияси саноат майдончалари учун тайёр лойиҳаларни ишлаб чиқиш ва амалга ошириш бўйича халқаро етакчи саналади. Компания ҳисобида барча минтақалардаги 35та давлатда амалга оширилган 400дан ортиқ лойиҳа мавжуд.