"Лестер" жамоаси бош мураббийи ўз бошқарувидаги жамоани таниқли персонаж Форрест Гампга тенглаштирди. Айни вақтда, АПЛнинг 17 туридан кейин "тулкилар" турнир жадвалида биринчи ўринни эгаллаб туришибди.

"Мен жамоамга ишонаман. Чунки, бу жамоа ўтган мавсумдаёқ ўз матонатини кўрсатиб қўйганди.

Нега энди биз шундай руҳда давом эта олмаслигимиз керак экан? Биз худди Форрест Гамп каби ҳаракат қиламиз. "Лестер" - бу Форрест Гампнинг ўзига ўхшайди. Биз ишлашимиз ва ишлашимиз керак. Биз ўз кучимизни тўғри баҳолай оламиз, ўзимизнинг қандай бардошли эканимизни биламиз. Бу футболчилар исталган чақириққа жавоб бера олишади.

Бизнинг ўйин услубимизми? Ўйинда тўпни назорат қилиш ўта муҳим. Аммо бу бизнинг муваффақиятларимизни таъминлайдиган асосий жиҳат эмас. Биз ўйинда тўпни назорат қилишга ҳаракат қилишдан ташқари, футболчиларнинг ўта аҳиллиги эвазига яхши натижалар учун интиламиз. Тан олиш керакки, бизда "Арсенал" ёки "Манчестер Сити"да бўлганидек юқори савияли футболчилар кўп эмас, лекин биз улар билан тенгма-тенг курашишда давом этамиз. Ҳар бир ўйин биз учун энг сўнггиси каби бўлади", дейди италиялик мутахассис.

Қайд этиш керакки, у мавсум давомидаги ҳар бир ғалабали ўйиндан кейин журналистларга интервью бериш чоғида ҳали АПЛда жон сақлаб қолиш учун қанча очко тўплаш кераклиги ҳақида гапириб, 40 очко тўплангунига қадар мавсум якуни бўйича ваъдалар беришга эрта эканлигини айтиб, камтарлик қилиб келарди.

Эндиликда жамоа турнир жадвалида 38 очко тўплаган ҳолда етакчилик қилмоқда. "Лестер" Boxing day ҳафтасида "Ливерпуль", "Манчестер Сити" ва "Борнмут" жамоаларга қарши ўйинлар ўтказади.