АҚШлик хонанда Мадонна суд орқали ўзининг катта ўғли Рокко Жон Ричини ўзи билан Нью-Йоркда таътилни ўтказишга мажбур қилди.

Ўсмир эса Янги йил байрамида отаси Гай Ричи билан Буюк Британияда қолмоқчи бўлган, деб ёзмоқда The New York Post нашри.

Нью-Йорк штати олий суди балоғатга етмаган Жон Ричини АҚШга онаси ёнига қайтишга мажбур қилди.

Мадоннанинг собиқ эри, режиссёр Гай Ричининг адвокати Эрик Бакли суд ҳаками Дебора Капланга 15 ёшли ўсмир суд қарорига қарамасдан, отаси билан қолишни истаётганини айтди. Ўсмир Нью-Йоркга келгач Жон Ричига адвокат тақдим қилишади, у онаси билан кўришиб, ўзининг якуний қарорини эълон қилиши керак бўлади.

Нашр манбасининг маълум қилишича, ўсмир Мадонна билан унинг охирги Rebel Heart гастроль турида икки ой давомида саёҳат қилган. “Бола онаси билан қолишни истамаган. Улар орасидаги муносабатлар яхшимас, бироқ бундай ҳолат ушбу ёшга хос”, деб айтди манба.

2008 йилда Мадонна 7 йиллик ўзаро турмушдан кейин Гай Ричи билан ажрашган. Уларнинг икки ўғил фарзанди бор. Жон Ричи 2000 йил августида дунёга келган.