Ўзбекистонда бир йилдан кейин кўчмас мулкни интернет орқали сотиш мумкин бўлади. 2016 йилнинг 4-чорагида электрон тижорат доирасида бошқа ҳужжатлар қаторида кўчмас мулкни сотиш қоидалари ҳам ишлаб чиқилади. Бу ҳақда Ўзбекистон Республикаси Вазирлар Маҳкамасининг 2014 йил 4 декабрдаги “2016-2018 йиллар даврида Ўзбекистон Республикасида электрон тижоратни ривожлантириш концепцияни тасдиқлаш тўғрисида”ги қарорида айтиб ўтилган. 

Буни амалга ошириш бўйича жавобгарлик Давлат рақобат қўмитаси, “Кўчмас мулк савдо маркази” МЧЖ ва Ўзбекистон ахборот технологиялари ва коммуникацияларини ривожлантириш вазирлиги зиммасига юкланган.

Ўзбекистонда электрон тижоратни ривожлантириш концепциясини тез суръатларда амалга оширишни Иқтисодиёт вазирлиги бошчилигида 6 та ташкилот олиб бормоқда.

Электрон тижорат доирасида экспорт-импорт операцияларини такомиллаштириш билан Ўзбекистон ташқи иқтисодий алоқалар, инвестициялар ва савдо вазирлиги, Давлат божхона қўмитаси ва Марказий банк шуғулланмоқда.

Тўлов операцияларини Марказий банк таъминлайди.

Электрон тижорат соҳасида рекламанинг мазмунини назорат қилиш ва ишончли рақобатдош муҳитни яратиш бўйича жавобгарлик Хусусийлаштириш, монополиядан чиқариш ва рақобатни ривожлантириш давлат қўмитасига юкланган.

Давлат статистика қўмитаси электрон тижорат секторларининг иқтисодиётдаги ролини тавсифловчи индикаторларни шакллантиради.