Россия президенти Владимир Путин Ҳукумат аъзолари билан учрашув чоғида, расмийлар экспортбоп маҳсулотларнинг паст нархда сотилишига ва Россияга қарши санкцияларнинг узоқ муддат давом этишига тайёр бўлиши кераклигини таъкидлаб ўтди. Бу ҳақда «Газета.ru» нашри хабар тарқатди.

«Экспортбоп маҳсулотларнинг паст нархларда сотилиши ва ташқи чекловларнинг узоқ муддат давом этишига тайёр бўлиш лозим. Ҳозирги қийин шароитда ўзимизда мавжуд имкониятлар орқали натижаларга эришиш, ижтимоий ва иқтисодий соҳаларда самарадорликни оширишга ҳаракат қилишимиз зарур бўлади», — дея таъкидлаган Россия президенти.

Олдинроқ, ҳукумат нефть нархининг 40 долларга тушиб кетиши натижасида бюджетни қайта кўриб чиқиш учун рухсат берганди.