Шри-Ланки чегарачилари тўғри ичагида ҳар бири 100 грамм келадиган 4 та олтин ёмби аниқланган эркакни ҳибсга олишди. Бу ҳақда The Nation нашри хабар берди.

42 ёшли гумонланувчи Коломбо шаҳридаги Бандаранайка аэропортида ҳибсга олинди. Аэропорт хизматчилари Сингапурдан учиб келган йўловчининг ғалати юраётганига эътибор беришган ва уни текшириб кўришга қарор қилишган. Эркак текширувдан ўтишга рози бўлган ва ўзини мамлакат вазирликларидан бирининг ходими сифатида таништирган. Умумий қиймати 14 минг долларга етадиган ёмбиларнинг келиб чиқишини эркак тушунтириб беришга қийналган. Ёмбилар олинган, тергов олиб борилмоқда.

The South China Morning Post нашри маълумотларига кўра, Шри-Ланкада йил бошидан бери олтин контрабандасида гумон қилиниб 70 дан кўпроқ одам қўлга олинган. Контрабандачилар олтинни арзонроқ бўлган Дубай ёки Сингапурда сотиб олиб, уни Ҳиндистонда қимматроққа сотишга ҳаракат қилишади. Ҳиндистон дунёда энг йирик олтин истеъмолчиси ҳисобланади, бироқ у ерда олтинни чегарадан олиб ўтиш учун катта солиқ тўланади – 100 граммлик олтиндан ўндан бир қисми (10 грамм) нархида давлат ғазнасига солиқ тўланиши керак.

Таҳлилчиларнинг маълумотларига кўра, Ҳиндистон йилига 642 тонна олтин истеъмол қилади. “Охирги ойларда олтин нархининг пасайиши унга талабнинг ошишига сабаб бўлди”, деб маълум қилди Ҳиндистон молия вазири Жайянт Синха.