Хитойнинг CNTIC консорциуми – Далянь электровозсозлик заводи “Ўзбекистон темир йўллари” акциядорлик жамияти локомотивлар паркини янгилаш бўйича ҳамкорлик ишлари доирасида 11та “O'z-ELR” номли юк электровозини етказиб берди.

"Янги электровозлар оғир юкларни тоғ шароитида ташишга мослаштирилган бўлиб, шу турдаги бошқа локомотивларга нисбатан бир қатор афзалликларга эга. Жумладан, замонавий тормозланиш тизимлари ва комплекс хавфсизлик қурилмалари ўрнатилгани боис электр энергияси сарфи 5-8 фоизга камаяди. Экологик хавфсизлик бўйича халқаро талабларга жавоб берадиган локомотив «Toshiba» (Япония) компаниясида ишлаб чиқарилган экологик тоза асинхрон электр двигателлари, носозликларни таҳлил қиладиган микропроцессор тизими билан жиҳозланган. Сарфланадиган материаллар ресурси замонавий материаллар қўлланиши ҳисобидан 15 фоизга кўпайган, электровознинг ҳаво резервуари ҳар қандай иқлим шароитида ундан ишончли фойдаланишга хизмат қилади",  – дейди “Ўзбекистон темир йўллари” акциядорлик жамияти бошқарма бошлиғи Нусратилло Абдуллаев.

Электровознинг қуввати 7200 кВтга тенг бўлиб, конструкцион тезлиги соатига 120 километрни ташкил этади. Янги локомотивларда қўлланилган замонавий технологиялар электр энергиясини тежаш баробарида тепловозларда ишлатилаётган ёнилғи сарфи 2-2,5 марта камайишига олиб келади.

ЎзА хабарига кўра, янги “O'z-ELR” электровозлар юк ташиш ҳажмини янада кўпайтириш имконини беради.