Бугунги кунда гўшт маҳсулотлари сотилишида қассоблар ва сотувчилар йўл қўяётган айблар “Оила даврасида” нашри ёритилди.
“Бозорга тушиб, гўштларни бир-бир кўздан кечирасиз... Ўзингиз хоҳлаган бўлакни кўрсатсангиз, сотувчи уни тарози палласига қўяди. Шу пайтда муштдеккина суяк ҳам яшин тезлигида тарози палласидан жой олади.

Сотувчидан бунга изоҳ сўрасангиз, «Ака, мол суяксиз бўлмайди-ку! Ҳамма жойда шунақа», деган мужмал гап билан қутулади. Харидор эса бу муаммога қандай ечим топишни билмай, боши қотади”, - деб ёзади муаллиф.

Аслида бу ўринда сотувчи билан харидор орасидаги муомалада қай бири ҳақ? Бу масала қай тартибда ҳал этилади? Уни тартибга солувчи бирон меъёрий ҳужжат борми?
Гўшт маҳсулотлари савдоси билан шуғулланувчи айрим шохобчаларда гўшт таркибидаги суяк ажратиб олинади ҳамда лаҳм гўшт ва суяк алоҳида-алоҳида нархларда сотилади.

Масалан, шу кунларда лаҳм гўшт 35 минг, ундан ажратиб олинган суяк эса 6 минг сўмгача савдога чиқарилмоқда. Оддий суякли гўштнинг нархи эса 25-30 минг сўм атрофида.
Бозорларда эса вазият сал бошқачароқ. Айрим сотувчилар қоқ суякни ўзини суяги меъёрида бўлган гўштга ҳам қўшиб сотишади. Лаҳм гўшт 30-32 минг сўм, ҳар қандай гўштга суяк қўшиб сотиш эса 25-28 минг сўм.

Бунда гўштга қўшиб бериладиган қоқ суякнинг миқдори 100-250 граммгача бўлиши мумкин.Шу тариқа, бозорда бир килограмм гўштнинг ўртача нархи 30 минг. Бир килограмм қоқ суякнинг нархи эса 3 минг сўм. Қоқ суяк қўшиб тортиб берилган 1 килограмм гўшт маҳсулотининг нархи 27 минг сўм.

Унинг таркибидаги қоқ суякнинг миқдори 150 грамм. 1 килограмми 27 минг сўм бўлган гўштнинг 850 грамми 22 минг 950 сўм. 150 грамм суяк эса 450 сўм. Жами 23 минг 400 сўм. Агар ўша 150 грамм суякни ҳам гўшт нархида ҳисобласак, 4050 сўмни ташкил қилади.

“Демак, харидор сотувчининг 23 400 сўмлик маҳсулоти учун 27 минг сўм пул тўлаяпти. Нега? Ўртадаги фарқ (3600 сўм) қаёққа кетяпти?”, - деб ёзади муаллиф.