Олмалиқдаги “Аммофос-Максам” кимё заводи 2019 йилнинг охиригача сульфат кислота ишлаб чиқарувчи янги корхона қурилишини охиригача етказишни режалаштирмоқда, деб маълум қилди корхонадаги манба Sputnik мухбирига.

Манбанинг айтишича, завод бу лойиҳани амалга ошириш учун учта йирик хорижий компания: Германиянинг LRC, Италиянинг Desmet Ballestra ва Финляндиянинг Outotec компанияси билан ҳамфикрлик келишувини имзолади.

Лойиҳанинг дастлабки қиймати 105 млн долларни ташкил қилади, ундан 60 млн доллари хорижий инвесторлар томонидан ажратилади. 2016 йилнинг 1-чорагида хорижий компаниялар лойиҳанинг технологик ташкил этувчиси ва қиймати бўйича таклифларини тақдим қиладилар.

Янги корхонанинг қуввати йилига 650 минг тонна сульфат кислотани ташкил қилади. Бу корхонанинг ишга туширилиши бугунги кунда эскириб қолган, 1981 йилда қурилган амалдаги мажмуани фойдаланишдан чиқаришга имкон беради.

2008 йилда “Аммофос-Максам” заводининг 49 фоиз акцияси Испаниянинг Maxam Corp компанияси томонидан сотиб олинган, у заводнинг модернизацияси учун камида 30 млн доллар инвестиция қилишни ўз зиммасига олган. Завод маҳсулотининг асосий импортчилари Хитой, Эрон, Афғонистон ва Тожикистон ҳисобланади.