24 декабрь куни Россия президенти Владимир Путин йирик бизнес вакиллари билан йиллик учрашув ўтказди. У компанияларнинг инқироз пайтидаги стратегиялари таҳсинга сазовор бўлганини қайд этиб, назорат органларини тартибга солишга ваъда берди.

Тадбирда 50га яқин тижоратчилар ва давлат компаниялари раҳбарлари ташриф буюрди. Улар орасида Владимир Потанин, Олег Дерипаска, Виктор Вексельберг сингари бизнесменлар, давлат корхоналаридан эса “Газпром” раҳбари Алексей Миллер, “Роснефть” раҳбари Игорь Сечинлар бор эди. Шунингдек, “Касперский лабораторияси” бош директори Евгений Касперский ҳамда “Группа “Илим” директорлар кенгаши раиси Захар Смушкинлар ҳам тадбирда иштирок этди.

Учрашув Москва вақти билан соат 18:00га мўлжалланган эди, лекин Путин яна бизнесменларни кутишга мажбур қилди: Ҳиндистон делегацияси билан учрашувда икки соатга ушланиб қолди.

Путин Янги йил билан барча иштирокчиларни табриклади, сўнг мамлакат иқтисодиётидаги қийинчиликлар ҳақида гапирди. Давлат раҳбари йирик бизнес вакиллари масъулиятни ҳис қилган ҳолда ҳаракат қилаётганини таъкидлаб ўтди ҳамда уларга миннатдорчилик билдирди.