Россиянинг олий назорат органи (Роскомнадзор) синов тартибида мамлакатнинг 19 минтақасида интернет ОАВнинг контентини тўплаш ва таҳлил қилиш тизимини ишга туширди. Бу ҳақда 25 декабрь куни “Известия” газетаси идора раҳбари Александр Жаровга таянган ҳолда маълумот берди.

“Таҳлилий асос Бош радиочастота марказидадир. Аниқланган ҳуқуқбузарликлар сони камида икки баробарга кўпайди”, - деди Роскомнадзор раҳбари.
Унинг сўзларига қараганда, тизим сайтларда жойлаштирилган матнларнинг қонунларга мувофиқлигини текширади. Форумлардаги пост ва изоҳлар ҳам таҳлил объектига киради. Текширувга мультимедиа файлларининг таърифлари ҳам жалб қилинади.

Агарда уларнинг таърифида шубҳали жиҳатлар қайд этилса, файллар Роскомнадзорга йўлланади.Жаров берган маълумотга қараганда, тизимни жорий қилиш 2016 йил охиригача давом этади. Ҳозирча қоидабузарлар жазога имкон қадар тортилмайди, бунинг ўрнига улар нуқсонларни тўғирлашга чорланади.
“Бу бутун РФ ҳудудида ОАВ сифатининг ошишига хизмат қилади деб ишонаман”, - хулоса қилди Жаров.