Самарқанд шаҳрининг Чашма маҳалласида жойлашган Инқилоб кўчаси фуқаролари ўз газ таъминотининг йўқлиги юзасидан норозиликларини билдирмоқда. STV телеканали тақдим этган маълумотларга қараганда, бир неча йилдан буён шаҳар расмийлари бу муаммони ҳал қилишга ваъда беришади, аммо бу борада амалий қадамлар ҳануз ташлангани йўқ.

2011 йилда кўчада истиқомат қилувчи фуқаролар вилоят ва шаҳар газ таъминоти идораларига, Самарқанд вилоят прокуратурасига мурожаат қилишган ҳамда шаҳар ҳокими Акбар Шукуровнинг 2015 йил 28 июнида газ қувурининг ўтказилиши тўғрисида буйруқ чиқаришига эришишган.

Шунингдек, уларнинг шикоят хатлари “Правда Востока” ва “Самаркандский вестник” газеталарида чоп этилган. Лекин бу чораларнинг ҳеч бири муаммонинг ҳал бўлишига олиб келмаган.
Маҳалла раиси Гулсара Жўрақулованинг ташаббуси билан фуқаролар “Марказгазтаъминот” корхонасига аҳолини суюлтирилган газ билан таъминлаш борасида мурожаатнома йўллаган.

2015 йилнинг 20 июлида маҳалла фуқароларининг илтимосига биноан “Марказгазтаъминот” УК ходимлари 350 м газ қувури ўтказишган. Август ойида монтаж ишлари якунланганига қарамай, STV’га 14 декабрь куни келиб тушган шикоят хатига қараганда, қувур орқали маҳаллага газ юборилмаяпти.

Телеканал ходимларининг шаҳар газ таъминоти хизматига йўллаган мурожаатларига жавобан барча маҳаллалар бирдай газ билан таъминланиши маълум қилинган. Бошқа бирор маънили тушунтириш берилмаган.

видеони mover.uz сайти орқали томоша қлишингиз мумкин