Қирғизистон миллий хавфсизлик давлат қўмитасининг аксилкоррупцион хизмати томонидан Туркиядан мамлакатга қалбаки АҚШ долларларининг келиши ва тарқатилиши канали аниқланди ва бартараф этилди. Бу ҳақда КирТАГ ахборот агентлиги маълум қилди.

“Ноябрь бошида Қирғизистонга Истамбул-Бишкек чартер рейси орқали номаълум шахслар томонидан 100 мингга яқин қалбаки доллар олиб ўтилган. Бу миқдордан 45 минг долларини Бишкекда яшовчи шахс олган, у ўз навбатида бу пулларни ўз танишларига тарқатиш ва алмаштириш учун берган”, дейилмоқда хабарда.

Тезкор-қидирув тадбирлари натижасида қалбаки пулларни тарқатиш билан шуғулланган Қирғизистоннинг 8 фуқаросидан иборат жиноий тўда аниқланган. Бу жиноий тўда таркибига бир нафар амалдаги ва 2 нафар собиқ милиция ходими ҳам кирган. Уларнинг яшаш жойлари бўйича қалбаки пулларнинг қолган қисми аниқланган. Жиноятчилардан 40 минг доллардан кўпроқ қалбаки пул мусодара қилинган.

Таъкидланишича, қалбаки долларлар барча ҳимоя даражалари қўлланган ҳолда юқори сифатда тайёрланган.Ушбу жиноят юзасидан Қирғизистон жиноят кодексининг тегишли моддалари бўйича жиноий иш қўзғатилди.