Украина Олий радаси 24 декабрда Халқаро валюта жамғармаси шартлари ҳисобга олиниб тузилган, 2016 йил учун давлат бюджетини қабул қилди. Ҳужжатни талаб қилинадиган минимал 226 овозда 263 нафар депутат қўллаб-қувватлади. Бу ҳақда “112” телеканали маълум қилди.

Бюджет ЯИМнинг 3,7 фоиз даражасидаги камомад билан тасдиқланган, 2016 йилда даромадлар 595,1 млрд гривнани (жорий курс билан 25,9 млрд доллар), харажатлар эса 684,5 млрд гривнани (29,9 млрд доллар) ташкил қилиши белгиланган. Инфляция даражаси 12 фоиз даражасида бўлиши, ЯИМ ўсиши 2 фоиз ўсиши прогноз қилинмоқда. Гривнанинг йиллик ўртача курси бир доллар учун 24,1 гривна қилиб ўрнатилган.

Давлат бюджети ХВЖнинг тавсияларига кўра янги ишланган солиқ кодексига асосланиб тузилди. Янги киритилган ўзгаришларга кўра, агар пенсия 3 минимал маошдан ошса, пенсияга 15 фоизлик солиқ солинади. Жисмоний шахслардан даромад солиғи 18 фоиз (аввал даромад миқдоридан келиб чиқиб 15-20 фоиз бўлган), ягона ижтимоий бадал 22 фоиз (иш берувчи меҳнат ҳақи жамғармасига тўлайди, аввал 41 фоиз бўлган) қилиб белгиланди.

Аввалроқ АҚШ молия вазири Жейкоб Лью Украина бош вазири Арсений Яценюк билан телефон суҳбатида Киев 2016 йил учун бюджетни қабул қилиши кераклигини айтганди. Лью акс ҳолда Украинага кўрсатиладиган халқаро молиявий кўмак тўхтатилиши мумкинлигидан огоҳлантирганди.