Туркия президенти Ражаб Тойиб Эрдўған Аl Arabiya телеканалига берган нтервьюсида Россия президенти Владимир Путиннинг аксилтеррор коалицияга қўшилиш бўйича таклифини рад этганини билдириб ўтди. Бу интервьюнинг тўлиқ шакли 27 декабрь куни эфирга узатилади.

"Сурия, Эрон, Ироқ ва Россия Бағдодда альянс тузишди ва Туркиядан бу иттифоққа қўшилишни сўрашди. Лекин мен Путинга қонунийлиги шубҳа остида бўлган президент (Сурия президенти Башар Асад - таҳририят изоҳи) бир стол атрофида ўтира олмаслигимни билдирдим", деган у.

Туркия раҳбари бу суҳбат қачон бўлиб ўтганига ойдинлик киритмаган.

Эслатиб ўтамиз, сентябрь ойида Ироқ пойтахтида Эрон, Россия ва Суриянинг бирлашган мувофиқлаштирувчи қўмитаси тузилган эди.

24 ноябрь куни Туркия Ҳарбий кучлари Россиянинг Су-24 бомбардимончи самолётини уриб туширди. Россия президенти Путин Су-24 Туркиянинг F-16 самолёти “ҳаво-ҳаво” ракетаси орқали уриб туширилгани ва Туркия чегараси яқиннида қулагани ҳақида хабар қилди.

Россия Ҳарбий Кучлари Бош Қўмондонлик штаби Су-24 Туркия ҳаво чегарасини бузмаганлиги такрорлади. Бунга далил сифатида Сурия Ҳаво Мудофааси маълумотларини келтирди. Аммо Туркия Су-24 мамлакат ҳаво чегарасини бузган деган фикрини ўзгартирмади.

Бу ҳодиса натижасида бир учувчи ҳалок бўлди. Штурман омон қолган. Россия Анқарага етказилган зарар учун товон тўлаш ва узр сўраш талабини қўйди. Туркия эса ўз ҳаракатига чегарани ҳимоя қилганини асос қилиб кўрсатиб, Россия қўйган шартларни бажаришдан бош тортди.