«Namnews.uz» нашри дунёнинг энг кекса инсонларидан бири — 118 ёшли Садияхон Иномова билан суҳбатни эълон қилди.
Сайт хабарига кўра, Садияхон Иномова 1897 йил Тўрақўрғон туманидаги Ёртепа қишлоғида дунёга келган. Бобоси Боймахсим эшон отаси Ҳамзахон қори бўлган бу аёлнинг умри меҳнат билан ўтди. Кетмончилик, ипак қурти парвариши, буғдой бошоғини териш, пахта териш, кўсак чувиш билан шуғулланган.

“Садияхон ая умр йўлдоши билан тинч-тотув ҳаёт кечирди, фарзандлар тарбиясига алоҳида эътибор қаратди. Ҳозирда 45 набира, 141 нафар эвара, 139 чеваранинг момосидир. Турмуш ўртоғи Исомиддин ота жуда қатъиятли, меҳнатсевар инсон бўлиб, хўжаликда темирчи бўлиб ишларди. 70-йиллар охирида у вафот этди.

Ая турмушнинг ўнқир-чўнқирларига бардош бериб, мардонавор енгиб ўтди. Вафо-садоқат, меҳр-муҳаббат билан фарзандларини вояга етказди. Қарийб 45 йил ипак қурти боқди, ҳалол ризқ топиб, умргузаронлик қилди”, - дея маълумот беради нашр.
Садияхон ая бугун жуда бахтли ҳаёт кечирмоқда. Фарзандлари, набира, эвара, чеваралари унинг атрофида парвона бўлишади.

Давлатимиз раҳбари ҳам аяни эъзозлаб, 2007 йилда “Шуҳрат” медали билан тақдирлаган. Уч асрни кўрган бўлса-да, онахон ўз саломатлигидан нолимайди, китобни кўзойнаксиз ўқийди.