Япониянинг Toyota Motor Corp. гуруҳи 2015 йилнинг 11 ойлик якуни натижаларига кўра, аввалроқ жаҳон автомобиль бозорида қўлдан чиқарган биринчилигини яна ўзига қайтарди. Бу ҳақда Nikkei Asian Review нашри хабар ёзди.

Daihatsu Motor ва Hino Motors`ни ҳам ўз таркибига олувчи японлар компанияси 2015 йилнинг январь—ноябрь ойларида 9,2 миллион автомашина сотганлигини маълум қилди. Бу ўтган йилги кўрсаткичлардан 1 фоизга кам бўлсада, Volkswagen`ни ортда қолдириш учун етарли бўлди.

2015 йилнинг биринчи ярим йиллиги натижалари бўйича япониялик рақибидан ўзиб кетган Германиянинг Volkswagen AG автоконцерни эса бу давр ичида 9,09 миллион автомобиль сотган.

Сентябрда юзага келган «дизель можароси»дан кейин Volkswagen 11 миллион автомобилини чақириб олишга мажбур бўлди.

Toyota компанияси эса яқинда бир қатор янги моделлар, жумладан, янгиланган Prius автомобилини чиқарди. Бу эса унга сотув ҳажмини кўпайтириш имконини беради.