Сербияда порахўрлик тўғрисидаги ишни тергов қилиш доирасида 79 киши ҳибсга олинди. Бу ҳақда мамлакат ички ишлари вазири Небойша Стефанович махсус матбуот анжуманида маълум қилди, дея хабар бермоқда ТАСС.

Унинг сўзларига кўра, порахўрликда айбланаётганлар ҳаракатлари туфайли 7,8 миллиард динар (100 миллион евро) зарар етказилган.
Қамоққа олинганлар орасида собиқ қишлоқ хўжалиги вазири Слободан Милосавлевич, унинг ўринбосари, шунингдек, муниципалитет (маҳаллий бошқарув органлари)лар раҳбарлари, йирик корхоналар бошқарувчилари ҳам бор.

Ҳуқуқни муҳофаза қилиш органлари уларни пора олиш, хизмат лавозими суиистеъмол қилиш, пулларни ноқонуний ўзлаштиришда айбдор деб ҳисобламоқда.
Стефановичнинг сўзларига кўра, тергов ишлари 2004 йилдан бошланган. “Операция давом этади, ҳеч кимга шафқат қилинмайди”, - деди вазир.