Хитой ҳукумати франциялик журналистни Хитойнинг уйғурларга нисбатан зўравонлик билан сиёсат юритгани ҳақида мақола ёзгани учун мамлакат ҳудудидан чиқариб юборади.

l'Obs журнали ходими бўлган Урсула Готьенинг айтишича, Хитой ташқи ишлар вазирлиги томонидан ўзига берилган пресс-картанинг муҳлати узайтириб берилмаган.

Бундай ҳолат 2012 йилдан бери илк марта кузатилмоқда. 3 йил олдин ҳам Хитой ҳукумати "Ал-Жазира" мухбири Мелисса Чанга ўз ҳудудида фаолият кўрсатишига рухсат бермаганди.

Хитойнинг бу қарори Франция ТИВ ва "Чегара билмас журналистлар" ташкилоти томонидан танқидга учради.

Маълумот учун, Хитойнинг шимоли-ғарбида жойлашган Шинжон-Уйғур мухтор вилоятида бир неча йиллардан буён сиёсий беқарорлик ҳолати ҳукм сурмоқда. Уйғурлар орасида айни вақтда Пекиндан мустақил бўлиш ғоясини олға сурувчи гуруҳлар фаоллашган.

Шинжонда айни вақтда 9 миллиондан ортиқ мусулмон динига эътиқод қилувчи уйғурлар истиқомат қилишади ва улар мухтор вилоят жами аҳолисининг 45 фоизини ташкил қилади.

Ҳуқуқ ҳимоячилари бир неча марта Хитой томонидан уйғурларнинг маданияти ва динига нисбатан репрессив сиёсат қўлланганини қайд этишган.

2009 йилда вилоят маркази Урумчи шаҳрида уйғурлар ва этник хитойликлар ўртасида юз берган тўқнашув туфайли 150 нафардан ортиқ киши қурбон бўлганди.